Leef Tuurhouters en Tuurhouterinnekes,
Nao heal get waeke zjwiege en al heal völ sjpas gehad mit de veurbereiding, waor ‘t op zaoterdig 22 november 2025 eindelijk zoa wiet. Op de aovend van t GLK ben ich oetgeroope es Jeugprinses Puck van de CV de Tuurhouters.
Gaer sjtèl ich mich veur aan uch allemaol. Ich ben Puck Latour en bienao 13 jaor. Woon hauf in Göttekaove oppe Veersesjtraot same met mien zösterke Ymke bie mien mam Anniek. De anger hauf waek woon ich in Zittert. In Ophaove bie pap Henri, Veerle en mien zösterke Cato. Dit sjoaljaor ben ich begoosj in de brökklas van ’t DacapoCollege in Zittert. Mien hobbies zeen voetballe. Ich sjpeel ‘t leefste op t middeveldj links veurin, same met mien team van de JO13-1 van VVZ in Lömmerich. Fortuna Sittard daovan ben ich fanatiek supporter, ich zit dao in waer en wèndj oppe Zuid tribune, woo ich al jaore ein sezoenskaart höb. Es ich neet aan ‘t voetballe bèn dan doon ich gaer mit mien vrunj van Ummer d’r Bie ’t jachseizoen door t dörp.
Ich bèn d’r greutsj op dat ich dit jaor veurop maog gaon in ’t Tuurhouterriek es Jeugprinses Puck. Same met Jeugprins Stijn zal ich d’r veur zörge dat veer ummer d’r bie zeen deze vastelaovend en dat dit ein sezoen wurd om noait meer te vergaete.
Mien motto zal dit jaor dan ouch zeen: “es Jeugprins en Jeugprinses, veer make sfeer, ummer d’r bie mit sjpas en plezeer. Vastelaovend viere veer, jeder jaor weer!”
Tuurhouters ALAAAAAF!