Beste Tuurhouters en Tuurhouterinnekes,
Wat vónj ich ’t sjiek wie ich 22 november j.l. bèn oetgeroope es Jeugprins van CV de Tuurhouters. Nao waeke van veurbereidinge treffe in ’t geheim en geneete van de veursjpas, kiek ich noe al erg oet nao de vastelaovend van 2026! Gaer sjtèl ich mich aan uch veur:
Ich bèn Stijn Salden, 11 jaor oud. Ich woon al mien heale laeve in Göttekaove, same mit mien zösterke Milou en mien auwwesj Roel en Maaike. Ich zit in groep 8 van basissjool De Leeuwerik. Mien hobbies zeen voetballe, breakdance, boete sjpeele en gamen.
Voetballe doon ich in de JO-12 bie VV Zwentibold in Lömmerich. In dit team wissel ich `t keepe aaf mit verdedige es “lètste man“. Fortuna Sittard is mien leevelingsprofclub in de Eredivisie en ich bezeuk dan auch aaf en toe mit miene pap eine thoeswedsjtried. Breakedance doon ich sinds dit jaor bie FEMFIT. Daonaeve sjpeel ich gaer boete mit mien vrunj, woo ónger jeugprinses Puck. Same sjpeel v’r dan ’t leefste “Jachseizoen”.
Vastelaovend viere zit bie ós in de femilie! Mien pap en mam waore in 2008 al prinsepaar van CV de Tuurhouters. Sindsdien zeen ze same actief bie de carnavalsvereiniging mit ’t organiseere van activiteite en bedeent pap de knupkes van ’t leeg en geluid. Mien zösterke Milou is dit jaor ein van de Dansmariekes.
Vanaaf dat ich ein hauf jaor auwt bèn, gaon ich al mit in d’n optoch mit oozze vrunjegroep “Ummer d’r Bie”. Dit jaor trèk ich, saame mit Puck, al veur de 11e keer mit in d’n optoch. Mer noe op dae groate jeugprinsewaage! Wat verheug ich mich dao noe al op!
Ich veng `t heel sjiek dat ich dit jaor es Jeugprins van CV de Tuurhouters de vastelaovend maog viere in ós eige dörp. Saame mit Jeugprinses Puck, Prins Bart I en Prinses Vivian, houp ich dat g’r deze vastelaovend auch ummer d’r bie zeet om d’r same ein sjoan vastelaovessezoen van te make!