Beste Tuurhouters en Tuurhouterinnekes,
Ich bin gebaore en getaoge op de Kapelwaeg in Bor. Auch ich vier de vastelaovend al van kleins af aan, als kindj ging ich altied heal gear samen mit mien ouwersj en zus in Bor op stap mit de vasteloavend.
Als 13 joarig maedje ben ich bie Gazelle komme korfballen en altied in Göttekaove blieve plekke. Samen mit mien vriendinnen van t team ging ich gear op vriedig op sjtap bie ’t Waeske. De Göttekaovese vasteloavend hub ich dan auch leren kenne op de donderdig veur de vastelaovend in de kantine en tiejes ’t Lang Ongerbokse bal. ’T joar doanoa leep ich veur ’t eesj mit in de optoch en ongertusje doon ich dat noe al zo’n dikke 20 joar. In al die joare hub ich Göttekaove en veural auch de Göttekaovese vastelaovend in mien hart gesloate. Dat ich dit joar samen mit Bart tiejes de optocht boave op de prinsenwage moag stoan, is dan auch un druim wat oetkump.
Ich wirk bie de Gemeinte Mestreech als projectmedewerker Stedelijke Ontwikkeling en ongersteun de projectmanagers en angere teamleden bie t ‘sjieker en sjoener’ make van de sjtad. In mien vrieje tied stoan ich doanaeve mit veul plezeer op het korfbalveld als trainer en coach van de jongste jeugd van Gazelle.
Samen hubbe veer unne zoon, Mick, en dochter, Mara, die de vastelaovend, zeker dit jaor, mit de paplaepel ingegaote kriege. Es gezin goan ver gear op stjap en weekendjes weg mit familie en vrunj. Veural de letste joare hubbe os geleerd wie belangriek het is om samen herinneringen te maken.
Os motto, veur oszelf en de(ze) vastelaovend, sjlut hie dan zeker auch op aan en is ooit al ins op un gooj maneer in un leedje op ut LVK same gevat:
“Wacht neet op later, want as later ierder is.
Heese veur niks gewach, heese de boët gemist
Proost en dans, spaar neet allein mer centen
Geneet, verzamel sjoen momenten”
Laote ver dit dan auch allemaol in gedachte houte es ver os dees vastelaovend taege komme en der zo same weer ein overgaetelijk sezoen van make vol mit sjoon momente.